nepal news in india

सरकारले साझालाई दिएको ३ अर्ब ब्याज सहित असुल गर्ने

मन्त्रीपरिषदको निर्णय

एनआईबि संवाददाता,काठमाडौं

२३ जनवरी २०२०

सरकारले साझा यातायात सहकारीलाई विद्युतीय सवारी साधन (बस) खरिदका लागि दिइएको ३ अर्ब रुपैया ब्याजसहित फिर्ता लिने भएको छ । सहकारीले विद्युतीय बस ल्याउन नसकेको पाइएपछि साँवा मात्रै नभई ब्याज रकम समेत फिर्ता लिने सरकारले निर्णय गरेको हो ।

मन्त्रीपरिषद्को यही माघ ६ गते बसेको बैठकले उक्त सहकारीलाई दिइएको रकम फिर्ता लिने निर्णय गरेको विहिवारको पत्रकार सम्मेलनमा सञ्चार तथा सूचना प्रविधिमन्त्री गोकुलप्रसाद बाँस्कोटाले जानकारी दिएका छन् । मन्त्रिपरिषद्को गत असार २४ र २९ गते को निर्णयअनुसार साझा यातायात सहकारीलाई ३०० वटा विद्युतीय बस खरिद गरी सञ्चालन गर्ने जिम्मेवारीसहित सरकारका तर्फबाट शेयर लगानी गर्ने निर्णय गरिएको थियो ।

सो संस्थाले निर्धारित समयभित्र ती बस सञ्चालन गर्न नसकेको र आवश्यक प्रक्रिया नै अगाडि नबढाएको पाइएकाले लगानी फिर्ता लिने निर्णय गरेको हो । यस्तै गत पुस ९ को निर्णय अनुसारवातावरणमैत्री विद्युतीय बसको प्राविधिक विवरण र लागत अनुमान एवं विद्युतीय बस आपूर्तिका लागि शर्त तयार पारी नयाँ खरिद गर्न भौतिक पूर्वाधार तथा यातायात मन्त्रालयलाई सैद्धान्तिक स्वीकृति दिइएको छ । सरकारको तर्फबाट उक्त खरीदकालागि ३ अर्ब अर्थ मन्त्रालयले भौतिक पूर्वाधार मन्त्रालयलाई उपलब्ध गराउने गरि निर्णय गरिएको हो ।

मन्त्रीपरिषदका अन्य निर्णयहरुः

दुई आयोगमा नियुक्ति

सरकारले संक्रमणकालीन न्यायसँग जोडिएका सत्य निरुपण तथा मेलमिलाप आयोग र बेपत्ता पारिएका व्यक्तिको छानबिन आयोगमा पदाधिकारी नियुक्ति गरेको छ । सत्य निरुपण तथा मेलमिलाप आयोगमा अध्यक्षमा गणेशदत्त भट्ट डडेल्धुरालाई नियुक्त गरिएको छ । यस्तै सदस्यहरुमा प्रचण्डराज प्रधान, गोविन्द गौतम, मन दाहाल र विष्णु पोखरेल हुनुहुन्छ ।
त्यस्तै बेपत्ता पारिएका व्यक्तिको छानबिन आयोगको अध्यक्षमा युवराज सुवेदी भोजपुरलाई नियुक्त गरिएको छ । यस्तै सदस्यहरुमा विश्वप्रकाश भण्डारी, गंगाधर अधिकारी, सुनिलरञ्जन सिंह, सरिता थापालाई नियुक्त गरिएको छ ।

रेल चलाउन कर्मचारी

निकट भविष्यमा सञ्चालनमा ल्याउन लागिएको जयनगर–जनकपुर–कुर्था रेलमार्गका लागि आवश्यक दक्ष श्रमिक नियुक्त गर्न सरकारले नेपाल रेल्वे कम्पनीलाई सैद्धान्तिक स्वीकृति दिएको छ । रेल सेवाका लागि दक्ष जनशक्ति नेपाली नागरिकबाट आपूर्ति हुन नसकेको खण्डमा मात्रै श्रम ऐन, २०७४ को दफा २२ बमोजिम २६ जनासम्म विदेशी दक्ष श्रमिक नियुक्त गर्न उक्त कम्पनीलाई स्वीकृति दिइएको हो ।

यस्तै,सरकारले सोही कम्पनीका लागि विभिन्न ४५ पदमा २ सय २६ दरबन्दीमा औचित्य र आवश्यकताअनुसार प्रतिस्पर्धात्मक प्रक्रियाको माध्यमबाट कर्मचारी भर्ना गर्न सैद्धान्तिक स्वीकृति दिएको छ । कर्मचारी भने करारमा भर्ना गरिनेछ । निर्माण सम्पन्न भएको जयनगर–जनकपुर–कुर्था रेलमार्ग निकट भविष्यमा नै सञ्चालन गर्ने गरी आवश्यक तयारी गरिएको छ ।

निगमका संचालक सदस्य खरेलको राजीनामा स्वीकृत

नेपाल वायु सेवा निगमका अध्यक्ष एवंं सञ्चालक सदस्य मदन खरेलले यही माघ १२ गतेदेखि लागू हुने गरी दिएको राजीनामा स्वीकृत गरिएको छ । रिक्त हुन आएको पदमा संस्कृति, पर्यटन तथा नागरिक उड्डयन प्राधिकरणका सचिवलाई तोक्ने निर्णय भएको छ ।

प्राधिकरणको जिम्मेवारी सहसचिव पौडेललाई

विशेष आर्थिक क्षेत्र प्राधिकरणको कार्यकारी निर्देशकको नियुक्ति नभएसम्मका लागि सम्पूर्ण आर्थिक एवं प्रशासकीय अधिकार प्रयोग गर्ने गरी उद्योग वाणिज्य तथा आपूर्ति मन्त्रालयका सहसचिव शोभाकान्त पौडेललाई जिम्मेवारी दिइएको छ । पौडेलले प्राधिकरणको कार्यकारी निर्देशकले गर्ने सबै काम गर्ने गरी जिम्मा दिइएको हो ।

भ्रष्टाचार गर्ने सूचीमा नेपाल सुधारोन्मुख, कम भ्रष्टाचार गर्नेमा दक्षिण एशियामा भूटान अगाडि

२३ जनवरी २०२०

भ्रष्टाचार गर्ने देशको सूचीमा नेपालले आफ्नो स्थान सुधार गरेको छ । ट्रान्सपरेन्सी इन्टरनेशनल नेपालले शुक्रबार सार्वजानिक गरेको ‘भ्रष्टाचार अवधारणा सूचकांक–२०१९’ अनुसार नेपाल तीन स्थान माथि उक्लिएको छ ।

नेपाल विश्वका १८० देशहरुको सूचीमा कूल १०० अंकमध्ये ३४ अंक प्राप्त गरेर ११३औँ स्थानमा परेको हो । सन् २०१८ मा ३१ अंकसहित नेपाल १२४औँ स्थानमा थियो ।

विश्व बैंक, वल्र्ड इकोनोमिक फोरम, ग्लोबल इनसाइट, बर्टेल्सम्यान फाउन्डेसन, वल्र्ड जस्टिस प्रोजेक्ट र भिडिइउम समेत गरी छ संस्थाका सर्वेक्षणका आधारमा नेपालको सुधार देखिएको हो ।

ट्रान्सपरेन्सी इन्टरनेशनलका अध्यक्ष डेलिया फरेरा रुवियोका अनुसार सरकारी तहमा हुने भ्रष्टचारबाट आजित जनतामा राज्यका निकायप्रतिको घटदो विश्वास घटाउन राजनीतिक सदाचारतर्फ उन्मुख हुनुपर्ने देखिएको छ ।

दलको चुनावी खर्चमा चन्दा र सहयोगबाट सिर्जना हुने भ्रष्टाचार तथा राजनीतिक व्यवस्थामा पर्ने पैसाको प्रभाव अन्त्य गर्नुपर्ने देखिएको सो अवधारणामा उल्लेख छ ।

दक्षिण एशियामा भुटान अगाडि

दक्षिण एशियामा सबैभन्दा कम भ्रष्टाचार गर्ने देशमा भूटान परेको छ । ६८ अंक प्राप्त गरी भूटान २५औँ स्थानमा छ । यस्तै श्रीलङ्का ३८ अंक प्राप्त गरी ९३औँ स्थानमा, माल्दिभ्स २९ अंक प्राप्त गरी १३० औँ स्थानमा र अफगानिस्तान १६ अंक प्राप्त गरी १७३औँ स्थानमा छ । भारत र चीन समान ४१ अंक प्राप्त गरी ८०औँ स्थानमा परेका छन् ।

सबैभन्दा कम र बढी भ्रष्टाचार गर्ने  मुलुक

सन् २०१९ मा विश्वमा सबैभन्दा कम भ्रष्टाचार हुने देशमा डेनमार्क रहेको छ भने सो राष्ट्रले ८७ अंक प्राप्त गरेको छ । विश्वमा सबैभन्दा बढी भ्रष्टाचार हुने देश सोमालिया रहेको छ । सो राष्ट्रले नौ अंक प्राप्त गरेको छ ।

ट्रान्सपरेन्सी इन्टरनेशनल नेपालका महासचिव मुकुन्द प्रधानका अनुसार सार्वजनिक पदको दुरुपयोगमा भ्रष्टचार विरोधी निकायको कारवाही, न्यायपालिकाका काम कारवाही, कर असुली सम्बन्धित विषय, सुरक्षा निकाय खासगरी नेपाली सेनामा सदाचारको पहल लगायत सार्वजनिक सरोकारका विषयमा नागरिक संस्थाको भूमिकाजस्ता कारणले नेपालको भ्रष्टाचार प्रवृतिमा केही सुधार आएको सर्वेक्षणले देखाएको छ ।

शाहले नड्डालाइ सुम्पिए बीजेपी अध्यक्षको जिम्मेवारी, कमललाई सम्पूर्ण भारतमा पुरयाउने अध्यक्षको उदघोष

भाजपा अध्यक्षमा नड्डा चयन

एनआईबि संवाददाता,नयाँ दिल्ली

२० जनवरी २०२०

भारतको सत्तारुढ दल भारतीय जनता पार्टी (भाजपा) को अध्यक्षमा नेता डा . जगत प्रकाश नड्डालाइ चुनिएको छ । पार्टीले सोमबार नाडालाई पार्टीको अध्यक्षमा निर्वाचित गरेको हो । नड्डा सोमबारदेखि औपचारिक रूपमा भाजपाको ११औँ अध्यक्ष बनेका छन् ।

विगत छ महिनादेखि कार्यबाहक अध्यक्षको रूपमा कार्य गरिरहेका नड्डालाइ पार्टीले पूर्ण रुपमा अध्यक्षको जिम्मेबारी दिएको हो । तत्कालिन पार्टी अध्यक्ष अमित शाह गृहमन्त्री भएपछि उनले राजीनामा दिएर नड्डालाई गत जुनमा कार्यबाहक अध्यक्ष बनाइएको थियो ।

प्रधानमन्त्री नरेन्द्र मोदीले नवनिर्वाचित पार्टी अध्यक्ष नड्डालाइ बधाइ दिदै उनको नेतृत्वमा पार्टी बिस्तारको कार्य हुने तथा अध्यक्षको रुपमा यशस्वी हुने आशा व्यक्त गरे ।

अध्यक्ष निर्वाचित भएपछि पार्टी कार्यालय पुगेका नड्डालाई गृहमन्त्री तथा पार्टीका पूर्व अध्यक्ष अमित शाहले फरक तरीकाले स्वागत गरेका थिए । उनले नड्डालाइ शुरुमा पदभार सुम्पिए र त्यसपछि मिठाइ ख्वाएका थिए । नड्डालाइ बसाउनकालागि शाहले आफैले कुर्सी तानेका थिए । शुरुमा शिष्टाचारका कारण नड्डा बस्न राजी भएका थिएनन तर शाहको आग्रहलाइ उनले टाल्न सकेनन् ।

अध्यक्षको पदभार संभाले लगत्तै नड्डाले कार्यकर्ताहरुको साथ लिएर पार्टीलाइ उत्कर्षमा पुरयाउन आफ्नो सम्पूर्ण ताकत र सामथ्र्य लगाउने बताएका छन् । उनले आधिकारिक ट्वििटरमा आफ्तो प्रतिवद्धता साझा गदै सबैसँग मिलेर सम्पूर्ण भारतमा कमलको फूल पुरयाउने विश्वास व्यक्त गरेका छन् ।

पूर्व केन्द्रिय मन्त्री जेपी नड्डा अमित शाहको ठाउँमा अध्यक्ष बनाइएका हुन् । बीजेपीका वरिष्ठ नेताहरु अमित शाह,राजनाथ सिंह,नितिन गडकरी लगायत अन्य मुख्यमन्त्री तथा नेताहरुले सोमबारको नामांकन प्रकृयामा नड्डाको नामको प्रस्ताव गरेका थिए । पार्टीले निर्वाचनको घोषणा गरयो ।

गृहमन्त्री शाह पछिल्लो साढे पाँच वर्षदेखि बीजेपी अध्यक्षको जिम्मेबारीमा थिए । पार्टीको द्रुत बिस्तार,संगठनको संरचनागत सुधार तथा २०१९को लोकसभा निर्वाचनमा भाजपाको बहुमतको जीतको श्रेय उनको नाम लेखिएको छ । भाजपाले आफ्नो दलमा सन् २०१९ सम्ममा १८ करोडभन्दा बढी सदस्यहरू रहेको दावी गरेको छ ।

जेपी नड्डाको राजनीतिक करिअर

नड्डाले १९९३देखि २००२ सम्म हिमांचल प्रदेश विधानसभाको सदस्य,१९९८ देखि २००३ सम्म हिमाँंचल सरकारमा केबिनेट मन्त्री , २००८ देखि २०१० सम्म हिमांचलमा प्रेमकुमार धुमल सरकारमा मन्त्री तथा अन्य मन्त्रालय संभालेका थिए । अप्रिल २०१२मा राज्यसभा साँसद चुनिएका नड्डाले २०१४देखि २०१९ सम्म मोदी सरकारको स्वास्थ्य मन्त्रीका रुपमा कार्य गरेका थिए । नड्डा अमित शाह गृहमन्त्री बनेपछि जुन २०१९मा भाजपाका कार्यकारी अध्यक्ष बनाइएका थिए ।

नड्डाका चुनौती

नड्डाका अघिल्तिर निर्वाचन चुनौती सबैभन्दा प्रमुख रहेको छ। नजीकिदै गरेको दिल्ली विधानसभा तथा बिहार विधानसभाको निर्वाचनको दबाबका समयमा नड्डा अध्यक्ष बनेका छन् । यसका अलाबा बीजेपीको हाथबाट कयौं राज्यको सत्ता फुत्किसकेको छ भने उत्तर प्रदेशको चुनाव पनि आउन लागेको छ ।

सभामुखको उम्मेदवार टुगिंएसँगै राजीनामा दिएँ: तुम्वाहाङ्फे

२० जनवरी २०२०

उपसभामुख डा शिवमाया तुम्वाहाङ्फेले सभामुखको उम्मेदवारको टुङ्गो लागेसँगै आफूले पदबाट राजीनामा दिएको बताएकी छन् । प्रतिनिधिसभाको बैठकमार्फत उपसभामुखबाट राजीनामा घोषणा गरेलगत्तै संसद्भवन नयाँ बानेश्वरमा पत्रकार सम्मेलन गरेर उनले संविधानले संसद्लाई नेतृत्वविहीन हुने कल्पना नगरेकाले सभामुखको उम्मेदवारको टुङ्गो लाग्नेबित्तिकै आफूले राजीनामा गरेको बताइन् । आइतबार नेकपाको सचिवालय बैठकले अग्निप्रसाद सापकोटालाई सभामुख बनाउने निर्णय गरेको थियो ।

उनले आफू दलको नभई संसद्को उपसभामुख भएकाले नेपाल कम्युनिष्ट पार्टी (नेकपा)ले राजीनामा गर्न दिएको निर्देशन मान्न नसकेको प्रस्टीकरण दिइन । ‘संसदीय मर्यादालाई ख्याल गरी मैले मार्गप्रशस्त गर्न राजीनामा गरेको हुँ’, तुम्वाहाङ्फेले भनिन ।उपसभामुखबाट राजीनामा गरेसँगै ट्रयाक परिवर्तन भएको उनको भनाइ थियो । उनले आफ्नो दुईवर्षे कार्यकालमा संविधान र कानूनबमोजिम कर्तव्य निर्वाह गरेको जिकिर गरिन ।

असोज १४ गतेपछि सभामुख पद रिक्त रहेको असहज परिस्थितिमा संविधानले दिएको अधिकार अनुसार आफूले प्रतिनिधिसभाको नेतृत्व गरेको उनले स्पष्ट पारिन । ‘उपभामुखबाट राजीनामा गर्दा म अत्यन्त खुशी छु, राजीनामासँगै मेरो प्रगतिका लागि थप उत्साह मिलेको छ’, उनले भनिन ।

संसद् सचिवालयको कर्मचारीले दुव्र्यवहारको आरोप लगाएपछि सभामुख कृष्णबहादुर महराले राजीनामा गरेका थिए । गत असोज दोस्रो सातादेखि प्रतिनिधिसभा सभामुखविहीन छ । ––रासस

सभामुखमा सापकोटालाई उम्मेदवार बनाउने नेकपा सचिवालय निर्णय

सत्तारूढ दल नेपाल कम्युनिष्ट पार्टी (नेकपा) ले प्रतिनिधिसभाको सभामुखमा स्थायी कमिटी सदस्य अग्निप्रसाद सापकोटालाई उम्मेदवार बनाउने निणर्य गरेको छ । प्रधानमन्त्री निवास बालुवाटारमा आइतबार बेलुका बसेको (नेकपा) सचिवालयको बैठकले सापकोटालाई सभामुखको उम्मेदवार बनाउने निर्णय गरेको पार्टीका महासचिव विष्णुप्रसाद पौडेलले जानकारी दिए ।

तत्कालीन सभामुख कृष्णबहादुर महरालाई यौन दुव्र्यवहारको आरोप लागी राजीनामा दिएपछि विगत चार महिनादेखि प्रतिनिधिसभाको सभामुख पद रिक्त रहँदै आएको छ । सभामुख नहुँदा प्रतिनिधिसभाको बैठक सूचना टाँस गरेर स्थगित हुँदै आएको छ । नेकपाको यो निर्णयसँगै प्रतिनिधिसभाले नयाँ सभामुख पाउने भएको छ ।

आइतबार बिहान पार्टी अध्यक्षयद्वय केपी शर्मा ओली र पुष्पकमल दाहाल ‘प्रचण्ड’ बीच भएको सहमतिका आधारमा सचिवालय बैठकले सापकोटालाई सभामुखमा उम्मेदवारी दिने निर्णय गरेको हो । तत्कालीन सभामुख महराले राजीनामा दिएपछि रिक्त रहेको उक्त पदमा कसलाई उम्मेदवार बनाउने भन्ने विषयमा पार्टीभित्र लामो छलफल भएको थियो ।

यही पुस ४ गतेदेखि शुरु भएको प्रतिनिधिसभाको बैठक सूचना टाँस गरेर स्थगित भइरहेको थियो । महासचिव पौडेलले बैठकपछि सचिवालयले एक मतका साथ सापकोटालाई उम्मेदवार बनाउने निर्णय गरेको जानकारी दिए । उनले भने, “उपसभामुखका सन्दर्भमा यसभन्दा अगाडिको बैठकले निर्णय गरिसकेको छ, उपसभामुख शिवमाया तुम्बाहाम्फेले राजीनामा दिएर सहयोग गर्नुहुने हाम्रो अपेक्षा छ ।”
अग्नि सापकोटा को हुन??
विसं २०१५ फागुन १४ गते सिन्धुपाल्चोकको कुभिण्डेमा जन्मिएका सापकोटाले १५ वर्ष अध्यापन गरेक थिए। नेता सापकोटा विसं २०३५ मा नेकपा (चौथो महाधिवेशन) बाट पार्टी राजनीतिमा लागेका हुन् ।

हाल नेकपा स्थायी कमिटी सदस्य रहेका सापकोटा २०६४ चैत २८ गते सम्पन्न पहिलो संविधानसभाको निर्वाचनमा सिन्धुपाल्चोक क्षेत्र नं २ बाट निर्वाचित भएका थिए । विसं २०६८ मा सूचना तथा सञ्चारमन्त्री बनेका सापकोटा २०७० को दोस्रो संविधानसभाको निर्वाचनमा पनि सिन्धुपाल्चोक–२ बाट दोस्रोपटक संविधानसभा सदस्यमा निर्वाचित भएका थियो ।

सापकोटाले २०७३ मा नेपाल सरकारको वन तथा भू–संरक्षण मन्त्रीको समेत जिम्मेवारी सम्भालेका थिए। विसं २०७४ मा भएको प्रतिनिधिसभाको निर्वाचनमा सिन्धुपाल्चोक क्षेत्र नं १ बाट निर्वाचित सापकोटा २०४८ सालदेखि सक्रियरूपमा राजनीतिमा क्रियाशील छन् ।

विसं २०५१ मा तत्कालीन नेकपा (एकता केन्द्र) को केन्द्रीय सदस्य हुँदै २०५१ असोजमा नेकपा (माओवादी) केन्द्रीय सदस्य भएका उनले विसं २०५२ माघदेखि भूमिगत राजनीतिसमेत गरेका थिए।

‘पाँच हजार अर्ब डलरको अर्थव्यवस्थाको लक्ष्य कठीन छ तर असंभव छैन’

एनआईबि संवाददाता,नयाँ दिल्ली

भारत सरकारका केन्द्रिय सडक,परिवहन तथा राजमार्ग मन्त्री नितिन गडकरीले आगामी चार वर्षमा ५ ट्रिलियन(५ हजार अर्ब डलर)को अर्थव्यवस्था बनाउने सरकारको लक्ष्य कठीन भएको तर असंभव नभएको बताएका छन् । उनले आन्तरिक उत्पादन बढाउँदै आयात निर्भरता कम गरेर यो लक्ष्य हासिल गर्न संभव भएको बताएका छन् । प्रधानमन्त्री नरेन्द्र मोदीले दोश्रो कार्यकालको नेतृत्व संभाले लगत्तै देशको अर्थव्यवस्थालाइ आगामी पाँच वर्षमा ५ ट्रिलियन पुरयाउने सरकारको महत्वकाँक्षी लक्ष्य घोषणा गरेका थिए ।

यद्यपि भारतीय अर्थव्यवस्थाको स्वास्थ्य पछिल्लो एक वर्षमा खस्क्दै गएको तथा विश्व बैंक,एशियाली विकास बैंक,अन्तराष्ट्रिय मुद्रा कोष तथा रिजर्भ बैंक अफ इन्डिया समेतले आर्थिक वृद्धिको रफ्तार खुम्चिएको बताइरहेको बेलामा मन्त्री गडकरीले ५ ट्रिलियनको अर्थव्यवस्था हासिल गर्न असंभव नभएको दाबी गरेका छन् ।  यहि परिवेशमा  इन्दौरमा आयोजित इन्दौर व्यवस्थापन संगठनको अन्तराष्ट्रिय प्रवंधन सम्मेलनलाइ सम्बोधन गर्दै गडकरीले भने, ‘कुनै पनि लक्ष्य हासिल गर्न मजबुत राजनीतिक इच्छाशक्ति आवश्यक हुन्छ । सोही इच्छाशक्ति अनुरुप प्रधानमन्त्री मोदीले देशको अर्थव्यवस्था ५ ट्रिलियन पुरयाउने लक्ष्य निर्धारण गरेका हुन् । ’

केन्द्रिय मन्त्रीले भने, यो लक्ष्य प्राप्त गर्न कठिन छ तर असंभव छैन् । मुलुकमा संसाधन र उत्पादन क्षमताको कमी नरहेको भन्दै गडकरीले भने, यसका बाबजुद पनि हामीे औषधि, चिकित्सा उपकरण,कोयला,ताँबा तथा पेपर लगायतका सामानको आयातमा करोडौ रुपैया खर्चिरहेका छौ । उनले भने, यदि हामीले लक्ष्य हासिल गर्नुछ भने हामीले आयात विस्थापित गर्दै घरेलु उत्पादन बढाउनु पर्छ ।’उनले विभिन्न क्षेत्रमा सही नजरिया तथा नेतृत्वको कमी भएको समेत उल्लेख गरे ।

गडकरीले सरकारको योजना दोहर्याउँदै विकास वृद्धिकालागि साना,घरेलु तथा मध्यम वर्गीय उद्योगीहरुको सहभागिता बढाउने तथा निर्यातलाइ बढावा दिने सरकारको योजना रहेको बताए । त्यसले मुलुकमा पाँच करोड नयाँ रोजगारी सिर्जना गर्न मदत पुग्ने विश्वास पनि उनले व्यक्त गरे ।

हालको सुस्त अर्थव्यवस्थाबारे आफ्नो टिप्पणि दिदै उनले भने, ‘हामी विश्वमा द्रुत गतिमा विकास गर्ने अर्थव्यवस्था हौ तर व्यवसायमा एउटा चक्र हुन्छ । वैश्विक अर्थव्यवस्था तथा माँग र आपूर्तिमा अन्तर भएको कारण कुनै कुने बेला चुनौती उत्पन्न हुन जान्छ । तर भारतको भविष्य युवा पुस्तामा निर्भर छ जुन चुनौतीपूर्ण अवस्थालाइ अवसरमा परिवर्तन गर्न सक्षम छन् ।’

भारतीय नोटमा लक्ष्मीको फोटो अंकित गर्न भाजपा सांसद स्वामीको सुझाव

एनआईबि संवाददाता, नयाँ दिल्ली

भारतीय मुद्रामा भगवान लक्ष्मीको फोटो राख्दा भारतीय अर्थतन्त्रमा सुधार आउन सक्ने भारतीय जनता पार्टीका नेता एवंम सांसद सुब्रमण्यन स्वामीले बताएका छन्।

इन्डोनेसियाको मुद्रामा हिन्दु भगवान गणेशको फोटो अंकित रहेको छ। भारतीय मुद्रामा यस्तो केही हुन सक्छ कि भन्ने पत्रकारहरुको प्रश्नको जवाफ दिँदै सांसद स्वामीले भन्छन् ‘भगवान गणेशले बाँधाहरुले टाढा राख्छन्। मेरो व्यक्तिगत विचारमा भारतीय मुद्रामा भगवना लक्ष्मीको फोटो अंकित गर्ने हो भने मुद्रा मजबुत हुन्छ भन्ने मेरो विश्वास छ।’

स्वामीले त्यो विषयमा प्रधानमन्त्री नरेन्द्र मोदीले अझ वृतितमा जवाफ दिन सक्ने बताउँदै आफू लक्ष्मीको फोटो भारतीय मुद्रामा अंकित गर्नुपर्ने पक्षमा भएको बताएका छन्। भारतीय मुद्रामा महात्मा गान्धीको फोटो अंकित रहेको छ।

लक्ष्मीको फोटो अंकित गर्दा कुनै पनि भारतीयलाई आपत्ति हुनुपर्ने कुरा नभएको सांसद स्वामीको दाबी रहेको यो समाचार आजको हिन्दुस्तान टाइम्समा प्रकशित छ।

अपोलो अस्पतालले गर्यो जटिल ट्यूमरको सफलता पूर्वक शल्यक्रिया

एनआईबि संवाददाता, नयाँ दिल्ली

नयाँ दिल्लीस्थित अपोलो अस्पतालले मस्तिष्क र मेरुदण्ढमा फैलिएको ट्यूमर (मेनिङजिआयोमा) को सफलता पूर्वक शल्यक्रिया गरेको छ। ४८ वर्षिय श्रेष्ठ थर भएका पुरुषको मेनिङजिआयोमा को शल्यक्रिया सफलता पूर्वक गरेको अस्पतालले जनाएको छ।

अपोलो अस्पतालका वशिष्ठ न्यूरोसर्जन प्रणव कुमारको नेतृत्वको टोलीले स्थायी ठेगाना नेपाल भएका श्रेष्ठको मस्तिष्क र मेरुदण्ढमा फैलिएको ट्यूमर सफलता पूर्वक निकालेको हो।

उपचारअघि श्रेष्ठको बानी व्यवहारमा परिर्वतन देखिनुका साथै शरिरको बाँया भाग कमजोर  पाइएको अस्पताले जारी गरेको प्रेस विज्ञप्तिमा जनाइएको छ। काठमाडौँमा पनि ट्यूमरको उपचार गराएका उनलाई अपोलो अस्पतालमा एमआरआई गर्दा बाँया भागमा  ठूलो ट्यूमरमा देखिएपछि उपचार गरिएको बताइएको छ।

‘शल्यक्रिया जोखिमपूर्ण मात्रै होइन, गाह्रो पनि थियो’, अस्पतालले जारी गरेको विज्ञप्तिमा भनिएको छ, ‘शल्यक्रियाको दौरान अधिक मात्रमा रक्तश्राव  हुने सम्भावना थियो र रक्तश्राव रोक्न नसक्दा बिरामीको ज्यानलाई खतरा थियो,’ विज्ञप्तिमा भनिएको छ।

काठमाडौँमा श्रेष्ठको ट्यूमरको उपचार भए पनि पूर्ण रुपमा ननिक्लिएपछि नयाँ दिल्लीस्थित अपोलो अस्पताल लगिएको थियो । ‘हामीले विरामीको ट्यूमर देख्ना साथ दोस्रो शल्यक्रिया गर्ने सल्लाह दिएका थियौँ, तर एक पटक शल्यक्रिया गरि सकेको परिवारले दोस्रो शल्यक्रिया गर्न अप्ठेरो मानेको थियो’, विज्ञप्तिमा भनिएको छ।
शल्यक्रिया सम्बन्धि जानकारी दिँदै शल्यक्रियामा संलग्न वरिष्ठ न्यूरोर्सजन प्रणव कुमार भन्छन्, ‘काठमाडौँमा गरिएको शल्यक्रियाभन्दा सफल रुपमा हामीले श्रेष्ठको ट्यूमर पूर्ण रुपमा निकाल्यौँ। शल्यक्रियापछि उनलाई काठमाडौँमा जस्तो रेडियोथेरापी गर्नुपरेन र रक्तश्राव पनि कम भयो।’
श्रेष्ठको ट्यूमरको शल्यक्रिया गर्दा उनलाई रगत दिनु नपरेको पनि अस्पतालले जारी गरेको विज्ञप्तिमा जनाइएको छ।

नेपाल भारत पारवहान सन्धि नविकरण, नेपालले चीनको सात बन्दरग्राह प्रयोग गर्न पाउने

एनआईबि संवाददाता, काठमाडौँ

नेपाल भारतबीच भएको पारवहन सन्धि नविकरण हुने भएको छ। पारवहन सन्धिमा नयाँ कुरा थप गर्दै दुई देशबीच भएको पारवहन सन्धि नविकरण हुन लागेको वाणिज्य मन्त्रालयका सचिव बैकुण्ठ आर्यालले जानकारी दिएका छन्।

नेपाल भारतबीच पारवहान सम्बन्धि नयाँ सन्धि भएपछि नेपालले भारतको आन्तरिक जलमार्ग प्रयोग गरेर आयात–निर्यात गर्न सक्ने सचिव आर्यालले बताएका छन्।

यस्तै नेपाल र चीनबीच २०७३ मा भएको पारवहन सन्धि कार्यान्वयनमा आउने उनले जानकारी दिए। जस अनुसार नेपालले चीनको सात बन्दरग्राह प्रयोग गर्न पाउने भएको हो।

चीनको चार सामुन्द्रिक र तीन सुख्खा बन्दरग्राह गरि नेपालका लागि सात बन्दरग्राहको बाटो खुला भएको छ। नोपल र चीनबीच भएको पारवहान सन्धि कार्यान्वयनमा आएसँगै नेपालले भारतका अतिरिक्त चिनियाँ बाटो हुँदै पनि तेस्रो मुलुकसँग व्यापार गर्ने बाटो खुलेको हो।

वाणिज्य मन्त्रालयका सचिव अर्यालले दिएको जानकारीअनुसार चीनको लियन्युंगा, सेन्जेन, तियान्जिन र झ्याङजियाङ गरी चार सामुद्रिक बन्दरगाह तथा लन्जाओ, ल्हासा र सिगात्से गरी तीन सुख्खा बन्दरगाह नेपालले प्रयोग गर्न सक्नेछ। 

उनले भने, ‘नेपालले भारतबाट मात्रै गर्दै आएको तेस्रो मुलुकसँगको व्यापार अब चीनबाट गर्ने बाटो खुलेको छ। यसले नेपालको अन्तर्राष्ट्रिय व्यापारमा बढोत्तरी हुने विश्वास लिएका छौँ।’

यस्तै रसुवा र तातोपानी नाकासहितका ६ नाका व्यापारिक प्रयोजनका लागि प्रयोग गर्न पनि बाटो खुलेको छ । हुम्लाको यारी सुंखवासभाको किमाथाङ्का, मुस्ताङको नेचुङ ९कोरला० र ताप्लेजुङको ओलाङचुङगोला गरी ६ वटा नाकाबाट नेपालले चीनसंग ब्यापार गर्न सक्ने मन्त्रालयले जनाएको छ।

यस्तै नेपालमा दर्ता भएका सवारी साधन अनुमति लिएर सिगात्सेसम्म जानसक्ने सहमति भएको मन्त्रालयले जनाएको छ।

पार्टी एकताकालागि सहमतिमा अघि बढन तयार छु : सभापति देउवा

एनआईबि संवाददाता,काठमाडौं

९ जनवरी २०२०

नेपाली काँग्रेसका सभापति शेरबहादुर देउवाले पार्टीमा एकता कायम राख्न र पार्टी सङ्गठन सुदृढीकरणका लागि सहमतिको आधारमा अघि बढन आफू तयार रहेको बताएका छन् । आफ्नै निवास बूढानीलकण्ठमा विहिबार काँग्रेसका जिल्ला सभापतिहरुलाइ खाना खानेगरि बोलाएका देउवाले पार्टीमा असन्तुष्ट पक्षसँग तत्काल संवाद थाल्ने र सहमतिका आधारमा अघि बढ्ने बताएको छलफलमा सहभागी काभ्रेपलाञ्चोकका सभापति मधु आचार्यले जानकारी दिए ।

सरकारले सूचना प्रविधि र विशेष सेवासम्बन्धीलगायत विधेयकका माध्यमबाट जनताका अधिकार कुण्ठित गर्न खोजेको आरोप लगाउँदै सभापति देउवाले लोकतन्त्रको रक्षाका लागि पनि पार्टी एक ढिक्का हुनुपर्ने आवश्यकता रहेको बताएका थिए ।

रामचन्द्र पौडेल समुहले बोलाएको जिल्ला सभापति बैठक समापन पछि विहिबार देउवाले बोलाएको दिवा खाना छलफलमा सहभागी भएका जिल्ला सभापतिहरुसँग गुनासो सहितको हर्षित मुद्रामा देउवा प्रस्तुत भएका थिए । झोंक्कि स्वभावका देउवा यो छलफल बैठकमा नरम रुपमा प्रस्तुत भएको सहभागीहरुले बताएका छन् । तीन दिने बैठकमा आफूलाइ नबोलाएको गुनासो उनले गरेका थिए ।

जिल्ला सभापतिहरुले सोमबारदेखि तीन दिनसम्म काठमाडौँमा चलेको ‘जिल्ला सभापतिको परामर्श बैठक’का निष्कर्ष देउवालाइ सुनाएका थिए । जिल्ला सभापतिहरुले सरकारका अलोकतान्त्रिक कदमका विरुद्ध सिङ्गो पार्टी एक भई सरकारमाथि दवाव सिर्जना गर्नुपर्ने अवस्थामा पार्टी बहुमत र अल्पमतका आधारमा चल्न नहुने भन्दै सहमतिको वातावरण कायम गर्न नेतृत्वलाई आग्रह गरेका थिए ।

साथै उनीहरुले केन्द्रीय कार्यसमिति बैठकबाट यही पुस ११ गते बहुमतका आधारमा गरिएको निर्णय सच्याई सहमतिका साथ पार्टीको १४औँ महाधिवशेनको कार्यतालिका बनाउन माग गरेका थिए ।

देउवाले सहमतिका आधारमा पार्टीको निर्णय गर्न आफूले लगातारको प्रयास गर्दा पनि संभव नभएपछि बहुमतिय प्रकृया अपनाएर निर्णय गरेको जिल्ला सभापतिहरुलाइ सुनाएका थिए । तर आफू अझै पनि कमी कमजोरीलाइ सुधारेर अघि बढन तयार रहेको छलफलमा सहभागी सभापतिहरुले बताएका छन् ।

छलफलमा सभापति देउवाका साथै उपसभापतिद्वय विमलेन्द्र निधि र विजयकुमार गच्छदार, महामन्त्री पूर्णबहादुर खड्का, सहमहामन्त्री डा प्रकाशशरण महत, प्रवक्ता विश्वप्रकाश शर्मालगायत सहभागी थिए भने विभिन्न जिल्लाका काँग्रेसका दुई दर्जन बढी जिल्ला सभापति उपस्थित थिए ।

काँग्रेस केन्द्रीय समिति बैठकले पुस ११ गते पार्टीको १४औँ महाधिवेशन २०७७ फागुन ७ देखि १० गतेसम्म गर्ने र केन्द्रीय समितिको समयावधि एक वर्ष थप गर्ने लगायत महत्वपूर्ण निर्णय बहुमतका आधारमा गरेको थियो । सो बैठकले महाधिवेशनको प्रयोजनार्थ विधानका केही दफा निलम्बन गर्ने, विधानमा उल्लेख २८ केन्द्रीय विभागको संख्या ४७ पु¥याउने, तरुण दलको म्याद छ महिना थप गर्ने लगायतका निर्णय पनि गरेको थियो ।

संस्थापन पक्षले केन्द्रीय समिति बैठकबाट बहुमतका आधारमा गरेको निर्णय र विधानविपरीत विधानका केही दफा निलम्बन गरेको भन्दै असन्तुष्ट बनेको वरिष्ठ नेता रामचन्द्र पौडेल समूहले भावी योजना तय गर्नका लागि सुझाव लिन जिल्ला सभापतिहरुको बैठक बोलाएको थियो । सो बैठकमा चार दर्जन बढी जिल्ला सभापतिको सहभागिता र समर्थन रहेको थियो ।

Nepal news headlines | breaking news kathmandu | national news of nepal live