INDIA

भारतमा कोरोना संक्रमितको संख्या चार हजार नाघ्यो

नयाँ दिल्ली, अप्रिल ६

भारतमा पछिल्ला केही दिनमा कोरोना संक्रमितको संख्या बढ्न थालेको छ । यससँगै भारतमा सोमबार बिहानसम्म संक्रमितको संख्या ४ हजार ६७ जना पुगेको बताइएको छ । भारतको स्वास्थ्य तथा परिवार कल्याण मन्त्रालयले दिएको जानकारीअुनसार भारतमा यहाँ पछिल्लो १२ घन्टामा कम्तीमा पनि ४९० जनामा संक्रमण देखिएको छ । साथै भारतमा कोरोनाको संक्रमणका कारण ज्यान गुमाउनेको संख्या पनि बढ्न थालेको छ । सोमबार बिहानसम्म ज्यान गुमाउने नागरिकको संख्या १०९ पुगेको सो मन्त्रालयले जानकारी दिएको छ ।

यी संक्रमितहरुमध्ये उपचारको क्रममा रहेका मध्ये २९२ जना भने उपचार गरी घर फर्किएका छन् । अरु ३ हजार ६६६ जना भने उपचाररत रहेका छन् । उनीहरु केही अस्पताल त केही आफ्नो घरमा नै निगरानीमा रही उपचार गराइरहेका छन् ।

भारतमा विस्तारै यसको प्रकोप बढ्न थालेको महसुश गरिएको छ । भारतका अरु राज्यको तुलनामा महाराष्ट्रमा यसका संक्रमितहरु बढेको देखिएको छ । महाराष्ट्रमा मात्र ६९० जना संक्रमित भेटिएको समाचारमा जनाइएको छ । त्यसैगरी त्यसपछि सबैभन्दा धेरै विरामी तामिलनाडुमा छन् । त्यहाँ ५७१ जना विरामी छन् भने नयाँ दिल्लीमा ५०३ जना विरामी रहेका छन् ।

भारतमा दुई सातायतादेखि देशैभर लकडाउनको घोषणा गरिएको छ । जसका कारण यहाँको जनजीवन निकै प्रभावित भएको बताइएको छ । तर यता दिन प्रतिदिन नयाँ संक्रमितहरु थपिँदै जान थालेपछि भने यो लकडाउनको अवधि पनि थप लम्ब्याउन सकिने देखिएको छ ।

लकडाउन पछिको योजना बनाउन मन्त्रीहरुलाई मोदीको निर्देशन

नयाँ दिल्ली ,अप्रिल ६

भारतका प्रधानमन्त्री नरेन्द्र मोदीले लकडाउनपछिका लागि विषेश योजना बनाउन संघीय मन्त्रीहरुलाई निर्देशन दिएका छन् । उनले मुख्य दश निर्णयका लागि तयारी गर्न र प्राथमिकताका दश क्षेत्र किटान गर्न मन्त्रीहरूलाई सोमबार निर्देशन दिएका हुन् ।

कोरोना भाइरसको संक्रमणका कारण देशका धेरै क्षेत्रमा दीर्घकालिन असर पर्ने भएकाले त्यसको सामना गर्नका लागि विषेश योजना, कार्यक्रम र रणनीतिहरु बनाउनुपर्नेमा प्रधानमन्त्री मोदीको जोड थियो । आफ्नो मन्त्रीपरिषद्का सदस्य मन्त्रीहरुसँग सोमबार भिडियो बैठक गर्दै उनले कोरोनापछि “भारत बनाऔँ” अभियान चलाउने गरी कार्यक्रमहरू ल्याउनुपर्ने बताएका थिए ।

उनले राष्ट्रिय तथा अन्तर्रािष्ट्रय क्षेत्रबाट शिक्षा लिँदै संकटलाई अवसरको रूपमा सदुपयोग गर्नु पर्नेमा पनि जोड दिए । प्रधानमन्त्री मोदीले अहिलेको संकटबाट चिकित्सा क्षेत्रलाई आत्म निर्भर बनाउनु पर्ने पाठ सिकिएको पनि बताए ।

आन्तरिक उत्पादनलाई जोड दिँदै निर्यात गर्न सकिने नयाँ क्षेत्र र देशहरूको पहिचान गर्न र कार्यान्वयन गर्न सकिने योजनाहरू ल्याउन उनले आह्वान गरेका हुन् । प्रधानमन्त्री कार्यालयद्धारा जारी वक्तव्यमा प्रधानमन्त्री मोदीले प्रान्तीय तथा जिल्लास्तरीय प्रशासनलाई संकट निवारणका लागि पर्याप्त रूपमा परिचालन गर्न तथा उनीहरुसँग राम्रो सम्पर्कमा रहन पनि आग्रह गरेको उल्लेख छ ।

उनले संकटका कारण उत्पन्न पछिल्लो अवस्थाका बारेमा वास्तविक अवस्था अध्ययन गरी समस्याहरूको समाधानका उपायहरू पहिल्याउन लगाएको पनि वक्तव्यमा जनाइएको छ । पर्याप्त अनुगमन गर्न र गलत गर्नेहरुलाई कारबाही गर्न पनि प्रधानमन्त्री मोदीले मन्त्रीहरूलाई निर्देशन दिएका छन् ।

उनले कोरोना विरुद्धको लडाई सकिएपछि देशलाई पहिलाभन्दा राम्रो अवस्थामा पु¥याउनु पर्ने र त्यसका लागि युद्धस्तरमा काम गर्नुपर्ने बताए । भारतमा कोरोना भाइरसको संक्रमण फैलिदै गएपछि गत मार्च २४ तारिखदेखि लागु हुनेगरी यही अप्रिल १४ तारिखसम्मकालागि २१ दिने देशव्यापी लकडाउन गरिएको छ ।लकडाउन लागु भएपछि प्रधानमन्त्री मोदीले पहिलो पटक भिडियो मार्फत् मन्त्रीपरिषद्को बैठक बसालेका हुन ।

डी राजाले प्रधानमन्त्री मोदीलाई पत्र लेखे 

यसैबीच प्रधानमन्त्री मोदीले कोरोना भाइरस विरुद्धको लडाईलाई थप प्रभावकारी बनाउन अन्य दलका नेताहरुसँग पनि छलफल गर्ने तयारी गरेका छन् । भारतीय कम्युनिष्ट पार्टीका नेता डी राजाले राजनीतिक दलका नेताहरुसँग छलफल गर्न आग्रह गर्दै सोमबार प्रधानमन्त्री मोदीलाई पत्र लेखेका थिए ।

“यो विषम परिस्थितिमा सबै राजनीतिक दलहरूले संयुक्त बल लगाएर कोरोना भाइरस विरुद्धको लडाईलाई सफल पार्नु पर्दछ, सवै दलहरुले हातेमालो गरेर राजनीतिक, आर्थिक र सामाजिक क्षेत्रमा काम गर्नु पर्ने देखिएको छ, ” उनले पत्रमा लेखेका छन् ।

त्यसका लागि प्रधानमन्त्री मोदीले नेतृत्व र सक्रियता देखाउनुपर्नेमा पनि नेता राजाले पत्रमा उल्लेख गरेका छन् । उनले सवै दलका नेताहरूसँग प्रधानमन्त्री मोदीले भिडियो बैठक गर्ने विश्वास पनि व्यक्त गरेका छन् ।

कानुन मन्त्री प्रल्हाद जोशीले जारी गरेको वक्तव्यमा लेखिएको छ, ‘प्रधानमन्त्री मोदीले यही अप्रिल ८ तारिखका दिन बिहान ११ बजे संसदमा पाँचभन्दा बढी सदस्य रहेका दलका नेताहरुसँग भिडियो बैठक गर्नुहुने भएको छ ।’

कोरोना मुक्त भारत बनाउन प्रधानमन्त्री मोदीको आह्वान

नयाँ दिल्ली, अप्रिल ६

भारतीय प्रधानमन्त्री नरेन्द्र मोदीले भारतलाई कोरोना फ्रि घोषणा गर्ने वातावरण बनाउन भारतीय जनता पार्टीका कार्यकर्ताहरुलाई अपिल गरेका छ्न् । उनले देशमा ‘कोभिड १९’ का संक्रमितहरुको संख्या बढ्दै गएपछि सबै भारतीय नागरिकलाई लकडाउनमा घरैमा बसेर सहयोग गर्न अपिल गरिएको प्रसंग उल्लेख गर्दै यस्तो अवस्थामा नागरिकलाई परेका समस्याहरुको समाधान गर्न पार्टी कार्यकर्ताहरुलाई आग्रह गरे ।

भारतीय जनता पार्टीको ४० औँ स्थापना दिवसका अवसरमा मोदीले कार्यकर्ताहरुलाई देश यतिबेला महामारीमा परिरहेकोले यस्तो बेलामा खटेर काम गर्न र आवश्यकताअनुसार नागरिकका समस्या र अप्ठयारोमा सघाउन समेत आह्वान गरे । सबै भारतीय नागरिकले प्रतिबद्धता र सहयोगका साथ लड्ने हो भने भारतलाई कोरोना मुक्त देश बनाउन धेरै गाह्रो नभएको उनले बताए ।

कोरोना भाइरसको बारेमा नागरिकमा जानकारी गराउने, चेतनामूलक कार्यक्रमहरुलाई नागरिकको घर दैलोमा लैजाने र सामाजिक दुरी कायम गरेर देशमा कोरोनाका विरुद्धमा लड्ने र त्यसलाई परास्त गर्ने काम गर्न उनले भारतीय जनता पार्टीका कार्यकर्ताहरुलाई अपिल गरेका हुन् ।

विश्वमा नै प्राणघातक यस भाइरसले प्रभाव पारिरहेका बेला भारतमा पनि पछिल्ला केही दिनमा कोरोना संक्रमितको संख्या बढ्न थालेको छ । भारतमा सोमबार बिहानसम्म संक्रमितको संख्या ४ हजार ६७ जना पुगेको बताइएको छ ।

भारतको स्वास्थ्य तथा परिवार कल्याण मन्त्रालयले दिएको जानकारीअुनसार यहाँ पछिल्लो १२ घन्टामा कम्तीमा पनि ४९० जनामा संक्रमण देखिएको छ । पछिल्ला केही दिनमा यहाँ ४ देखि ५ सयका दरले कोरोना संक्रमितको संख्या बढ्दै गएको बताइएको छ ।

साथै भारतमा कोरोनाको संक्रमणका कारण ज्यान गुमाउनेको संख्या पनि बढ्न थालेको छ । सोमबार बिहानसम्म यसबाट ज्यान गुमाउने नागरिकको संख्या १०९ पुगेको सो मन्त्रालयले जानकारी दिएको छ ।

भारतमा कोरोनाका संक्रमितहरु उचारपछि निको भएर घर पनि फर्किएका छन् । उपचारपछि २९२ जना घर फर्किएका छन् । अरु ३६६६ जना भने उपचाररत रहेका छन् । उनीहरु केही अस्पताल त केही आफ्नो घरमा नै निगरानीमा रही उपचार गराइरहेका छन् ।–– रासस/एएनआई

नेपालमा थप तीन जनामा कोभिड–१९ संक्रमण, संक्रमितको संख्या नौ पुग्यो

काठमाडौं,अप्रिल ४

नेपालमा थप तीन जनामा कोरोना भाइरस (कोभिड–१९) को संक्रमण देखिएको छ । मुम्बइबाट फर्किएका कैलालीका २१ वर्षीय र उत्तराखण्डबाट फर्किएका कञ्चनपुरका ४१ वर्षीय पुरूष तथा कैलालीको ३४ वर्षीया महिलामा कोभिड–१९ को संक्रमण देखिएको स्वास्थ्य तथा जनसंख्या मन्त्रालयको इपिडिमियोलोजी तथा रोग नियन्त्रण महाशाखाका निर्देशक डा. वासुदेव पाण्डेले जानकारी दिए । महिला यसअघि कैलालीमा संक्रमित भेटिएका पुरूषकी आफन्त हुन् ।

योसँगै नेपालमा कोभिड–१९ को संक्रमितको संख्या ९ पुगेको छ । उनीहरुको केही दिनअघि स्वाब लिएकोमा शुक्रबार गरिएको परीक्षणका क्रममा संक्र्रमण देखिएको महाशाखाका निर्देशक डा. पाण्डे बताए । तीनै जनाको अहिले धनगढीस्थित सुदूरपश्चिम प्रादेशिक अस्पतालमा उपचार भइरहेको छ ।

यसअघि विदेशबाट आएकालाई मात्रै कोभिड–१९ को संक्रमण देखिएपनि पहिलो पटक नेपालभित्र कै महिलामा संक्रमण देखिएको हो । गत माघ ९ गते चीनबाट नेपाल आएका विद्यार्थीमा पहिलो पटक कोभिड–१९ संक्रमण देखिएको थियो । उनी निको भई घर फर्किसकेका छन् । अन्य संक्रमितको भने आइसोसेलनमा राखि उपचार भइरहेको मन्त्रालयले जनाएको छ ।–रासस

भारतमा कोराना भाइरस सङ्क्रमणका ६४७ व्यक्ति तवलिगी जमातसँग सम्बन्धित : स्वास्थ्य मन्त्रालय

नयाँ दिल्ली , अप्रिल ३

भारतका विभिन्न १४ राज्यमा कोरोनाभाइरस सङ्क्रमण पुष्टि भएका व्यक्ति दिल्लीस्थित निजामुद्दिन मश्जिदमा हालै सम्पन्न इस्लामको धार्मिक सभा तबलिगी जमातसँग सम्बन्धित भेटिएका भारतीय स्वास्थ्य तथा परिवार कल्याण मन्त्रालयले शुक्रबार जानकारी दिएको छ । ‘भारतमा सङ्क्रमण पुष्टि भएका व्यक्तिमध्ये निजामुद्दिनमा भएको तबलिगी जमातमा सहभागी भएर घर फर्किएका वा उनीहरूसँगको सम्पर्कबाट सङ्क्रमित भएका व्यक्ति रहेको सरकारको तथ्याङ्क रहेको छ,’ मन्त्रालयका सह–सचिव लव अग्रवालले सञ्चारकर्मीसँगको कुराकानीमा बताएका छन् । ‘ती सङ्क्रमणहरू अण्डमान, निकोबार, असाम, दिल्ली, हिमाञ्चल, हरियाणा, जम्मु तथा काश्मिर, झारखण्ड, कर्नाटक, महाराष्ट्र, राजस्थान, तामिलनाडु, तेलङ्गना, उत्तराखण्ड र उत्तर प्रदेशमा भेटिएका हुन,’ उनले भने ।

विगत २४ घण्टामा मृत्यु भएका १२ व्यक्तिमध्ये केही व्यक्ति तबलिगी जमात धार्मिक कार्यक्रमका सहभागी र उनीहरूका आफन्त रहेका छन् । भारतमा केही विदेशबाट आएका व्यक्तिबाट भित्रिएको विश्वास गरिएको कोरोनाभाइरस सङ्क्रमण थप फैलिनमा भारतीय राजधानीमा केही दिन पहिले सम्पन्न तगलिबी जमात सभा पनि जिम्मेवार रहेको अधिकारीहरूले दावी गरे । महाराष्ट्र, कर्नाटक र तेलङ्गनामा भएका केही मृत्यु तबलिगी जमातमा सहभागीमध्येबाट भएका पनि पुष्टि भएको हो ।

‘फस्र्ट इन्फर्मेसन रिपोर्ट(एफआईआर)’ ले यसपहिले नै भारतको संक्रामक रोग नियन्त्रण ऐन १८९७ अनुसार सरकारले सङ्क्रमण फैलिन नदिन गरेको राष्ट्रव्यापी निर्णयको उल्लङ्घन गर्दै राष्ट्रिय राजधानीमा उक्त धार्मिक सभा गरेको आरोपमा तबलिबी जमातका प्रमुख मौलाना साद र यसका अन्य जिम्मेवार अधिकारीविरूद्ध मुद्दा दर्ता गरेको छ ।

भारतीय चिकित्सा अनुसन्धान परिषद् (आइसीएमआरका) मनोज भि मुर्हेकरका अनुसार भारतभर विभिन्न १८२ ल्यावहरूले कोभिड–१९ सङ्क्रमण परीक्षण गरेका छन् भने यीमध्ये १३० सरकारी ल्याब रहेका छन् । उनीहरूले विगत २४ घण्टामा कोभिड–१९ सङ्क्रमणको आशङ्का लागेका आठ हजार व्यक्तिको नमूना परीक्षण गरेका छन् ।

भारतमा कतिपय व्यक्तिलाई संक्रमणको आशंकापछि क्वारेन्टाइनकालागि अस्पतालमा लग्ने क्रममा प्रहरी र अनुगमनका लागि अस्पताल भर्ना गरिएकोमा कतिपय व्यक्तिले स्वास्थ्यकर्मीमाथि पनि अभद्र व्यवहार देखाएको भन्ने सूचनाबारे सोधिएको प्रश्नमा गृह मन्त्रालयका सहसचिव पुन्य सलिला श्रीवास्तवले आक्रमण गर्नेलाई कानुनअनुसार सजायँ हुने बताइन् ।

दिल्ली सरकारद्वारा ३२८ राहत केन्द्र स्थापना

नयाँ दिल्ली,अप्रिल ३

भारतको राजधानी नयाँ दिल्लीमा ३२८ वटा राहत केन्द्र स्थापना गरिएको छ । नयाँ दिल्लीका मुख्यमन्त्री अरविन्द केजरिवालले ५७ हजार मानिसलाई पुग्नेगरी राहत केन्द्र स्थापना गरिएको शुक्रवार जानकारी दिए ।

विद्युतीय माध्यममार्फत गरिएको पत्रकार सम्मेलनमा उनले भने,‘दिल्ली सरकारले ५७ हजार मानिसलाई पुग्नेगरी ३२८ वटा राहत केन्द्र तयार पारेको छ।’ उनका अनुसार लकडाउनका कारण अप्ठयारोमा परेकाको लागि ति राहत केन्द्रहरु स्थापना गरिएको हो ।

‘राहत केन्द्रमा जो सुकै पनि आएर बस्न सक्छन्, उनीहरूलाई हामीले हेरचाह गर्नेछौ’ उनले भने । नयाँ दिल्ली राज्यमा शुक्रवारसम्म ३८४ जना कोरोना भाइरसबाट सङ्क्रमित भएको जानकारी दिदै उहाँले तिमध्ये ९१ जना पछिल्लो २४ घण्टामा थपिएको बताए । उनका अनुसार नयाँ दिल्लीमा कोरोना भाइरसका कारण पाँच जनाको मृत्यु भएको छ ।

देशभरी शुक्रवारसम्म दुई हजार ३०० भन्दा बढि सङ्क्रमित भएकोमा १५६ जना निको भएर घर फर्केका छन् । देशभरी कोरोना कारण मृत्यु हुनेको संख्या ५६ पुगेको केन्द्रीय स्वास्थ्य तथा परिवार कल्याण मन्त्रालयले जनाएको छ ।

दक्षिण–पूर्वी एशियाली राष्ट्र कोभिड नियन्त्रण गर्न एकजुट

काठमाडौं,अप्रिल २

विश्वभरि फैलिएको कोभिड–१९ को रोकथाम र नियन्त्रण सम्बन्धमा आज विश्व स्वास्थ्य सङ्गठन (डब्लुएचओ)को दक्षिण–पूर्वी एशियाली राष्ट्रको सङ्गठन (सेरो)का सदस्य राष्ट्रबीच छलफल भएको छ । सबै देशले आ–आफ्नो मुलुकबाट स्वास्थ्यमन्त्रीले आज भिडियो कन्फरेन्सका माध्यमबाट कोभिड–१९ को रोकथाम र नियन्त्रणका लागि एकजुट हुनुपर्नेमा जोड दिएका छन् । नेपालका तर्फबाट स्वास्थ्य तथा जनसंख्या मन्त्री भानुभक्त ढकाल उक्त भिडियो कन्फरेन्समा सहभागी भएका थिए ।

सो अवसरमा उनले विश्वमा महामारीका रुपमा फैलिएको कोभिड–१९ को रोकथाम र नियन्त्रण गर्न नेपाल सरकार लागिपरेको जानकारी गराएको मन्त्रालयका स्वास्थ्य विज्ञ सल्लाहकार डा खेम कार्कीले जानकारी दिए । उनका अनुसार मन्त्रीले कोभिड–१९ को रोकथाम र नियन्त्रण गर्न सबैको साझा समस्या भएकाले दक्षिण–पूर्वी मुलुकले पनि संयुक्तरुपमा महामारीविरुद्ध लड्नुपर्नेमा मन्त्री ढकालले जोड दिएका थिए ।

मन्त्री ढकालले नेपाल सबै हिसाबले नियन्त्रणको तयारीमा लागेको उल्लेख गर्दै अहिलेसम्म सफलता हासिल गरिरहेको बताए । सबै देशका स्वास्थ्यमन्त्रीले सेरो सदस्य राष्ट्रले महामारीविरुद्ध सञ्चालन गरेको अभियानमा सँगसँगै जानुपर्नेसमेत बताएको डा कार्कीले जानकारी दिए । उनीहरुबीच कोभिड–१९ नियन्त्रण गर्न अहिलेसम्म खेलेको भूमिकाको अनुभव आदानप्रदान गर्नुका साथै औषधिजन्य सामग्रीका बारेमा छलफल भएको थियो ।

उनीहरुबीच विहिबार दिउँसो करिब दुई घण्टा कोभिड–१९ को रोकथाम र नियन्त्रणबारे छलफल भएको थियो । नेपाल, भारत, भूटान, बङ्गलादेश, म्यान्मार, उत्तर कोरिया, टिमोर लिस्टे, श्रीलङ्का, पाकिस्तान, माल्दिभ्स र अफगानिस्तानलगायतका मुलुक सेरोमा सहभागी रहेका छन् ।––रासस

अत्यावश्यक वस्तु उत्पादन गर्ने उद्योग र आयोजना सञ्चालन गर्न दिइने

काठमाडौं,अप्रिल २

सरकारले अत्यावश्यक वस्तु उत्पादन गर्ने उद्योग र विभिन्न क्षेत्रमा सञ्चालित आयोजनालाई तोकिएको स्वास्थ्य मापदण्ड पूरा गरी सञ्चालन गर्न दिने भएको छ । प्रधानमन्त्री तथा मन्त्रिपरिषद्को कार्यालय सिंहदरबारमा उपप्रधानमन्त्री तथा रक्षामन्त्री ईश्वर पाखरेल नेतृत्वको कोभिड–१९ रोकथाम तथा नियन्त्रण उच्चस्तरीय समन्वय समितिको बैठकले अहिलेसम्म भए गरेका गतिविधिको पुनरावलोकन गर्दै अत्यावश्यकीय वस्तुको आपूर्ति सहज बनाउन र आयोजनालाई गति दिन उक्त निर्णय गरेको हो ।

मुलुकभित्र खाद्य र अत्यावश्यक वस्तु उत्पादन गर्ने उद्योगलाई स्वास्थ्यका मापदण्ड पूरा गरेर सञ्चालन गर्न दिने र अन्य उद्योगले पनि आफ्नै आवासीय मजदूर परिचालन गरेर सञ्चालन गर्न सक्ने भए त्यसलाई पनि सञ्चालन गर्न दिने निर्णय भएको सरकारका प्रवक्ता डा युवराज खतिवडाले जानकारी दिनुभयो । ती उद्योग सञ्चालन गर्दा स्वास्थ्यका मापदण्ड पूरा गर्नुपर्नेछ । सञ्चालन गर्ने उद्योगलाई स्थानीय प्रशासनको आवश्यक सहयोग रहने छ । उद्योग सञ्चालन गर्दा भने आवागमन गर्न पाइने छैन ।

समितिको बैठकले तामाकोशी जलविद्युत् आयोजना, मेलम्ची खानेपानीलगायत आयोजनाका मजदूर धेरै रहेकाले सुरक्षाका सबै उपाय अपनाएर बाहिरबाट प्रवेश गर्न नदिइ भित्रकै कामदारलाई परिचालन गरी सञ्चालन गर्न दिने निर्णय पनि गरेको छ । अन्य आयोजनालाई पनि आफ्नै क्षेत्रभित्रका मजदूर बाहिर नपठाइ परिचालन गरेर सञ्चालन गर्न अनुमति दिने र यसको सहजीकरण भने स्थानीय प्रशासनले गर्ने निर्णय भएको अर्थ, सञ्चार तथा सूचना प्रविधिमन्त्रीसमेत रहनुभएका सरकारका प्रवक्ता डा खतिवडाले जानकारी दिए ।

हिउँदे बाली भित्र्याउने र बर्खे धान रोप्ने बेला भएकाले गहुँ काट्ने या धान रोप्ने या अन्य कृषि कार्य गर्ने विषयमा बाहिरी श्रमिक नल्याइ स्थानीय र पारिवारिकरुपमा बाली लगाउन र उठाउनका लागि अवरोध नगर्ने निर्णय पनि बैठकले गरेको छ । बैठकमा पछिल्लो मन्त्रिपरिषद्को निर्णय र कोभिड– १९ क्राइसिस म्यानेजमेन्ट सेन्टरलाई समन्वय समितिले सहजरुपमा परिचालन गर्ने विषयमा समेत छलफल भएको थियो । मुख्यतः स्वास्थ्य उपचार, खाद्यान्न, स्वास्थ्य सामग्रीको आपूर्ति, शान्तिसुरक्षा तथा सूचना प्रविधिलगायतका कार्यसम्पादन गर्ने विषयमा क्यालेन्डर बनाएर अघि बढ्ने गरी छलफल भएको सरकारका प्रवक्ता डा खतिवडाले जानकारी दिए ।

कोभिड–१९ को सङ्क्रमण रोक्न अत्यावश्यक कामबाहेक बाहिर ननिस्कने गरी जारी गरेको आदेश ‘लकडाउन’ को आज १०औँ दिनमा आवश्यक वस्तु औषधि, खाद्य सामग्री र इन्धनको आपूर्ति असहज नहोस् भनेर ढुवानीका साधनलाई अझै सहज गर्ने निर्णय पनि बैठकले गरेको छ । नियमितरुपमा आयात भएका दैनिक आवश्यकीय वस्तु र मुलुकभित्र उत्पादन भएका वस्तुको लेखाजोखा राख्ने निर्णय पनि बैठकले गरेको छ ।

सीमाको क्वारेन्टाइमा बसेका नागरिकलाई अप्ठ्यारो हुन नदिन नेपालमा भएका विदेशी श्रमिकलाई सरकारले आवश्यक सुरक्षा दिने निर्णय गर्दै विदेशमा भएका नेपालीलाई पनि सुरक्षितरुपमा राखेकामा ती मुलुकलाई धन्यवाद दिने निर्णय पनि भएको छ । उनीहरुलाइ १४ दिन भने क्वारेन्टाइनमा बस्नुपर्ने भएकाले एकआपसमा सहयोग गर्नसमेत अनुरोध गरिएको छ ।

स्वास्थ्य सामग्रीको विषय अनुसन्धानपछि मात्रै भन्न सकिने

सरकारका प्रवक्ता डा खतिवडाले पत्रकारले सोधेको जिज्ञासामा स्वास्थ्य सामग्री खरिदका विषयमा कसैले भनेको कुराबाट प्रभावित नभई आवश्यक अनुसन्धानपछि मात्रै भन्न सकिने बताए । ‘महत्वपूर्ण कुरा सामग्री आएर मानिसको जीवन रक्षा भइरहेको छ, महङ्गो भयो कि भएन, विधि पुग्यो कि पुगेन भनेर हेर्ने निकाय छुट्टै छ’, डा खतिवडाले भने ।

सरकारी तवरबाटै सामान ल्याउँदा उत्तम हुने जानकारी दिँदै मन्त्री खतिवडाले सरकारले यसअघि प्रयोग गरे पनि सफल हुन नसकेको बताउनुभयो । दुवै छिमेकी मुलुक समस्यामा परेकाले सरकारी तवरबाट खरिद गर्न नसक्दा निजी क्षेत्रलाई आह्वान गर्नु परेको उनले अनुभव सुनाए । सरकारी तवरबाट गर्न सकिन्छ भने त्यसमा पनि आवश्यक कदम चाल्ने विषयमा समेत विहिबारको बैठकमा छलफल भएको मन्त्री खतिवडाले जानकारी दिए । —रासस

कोभिड–१९ : सङ्क्रमण परीक्षण र पहिचानमा जोड दिन मोदीको आग्रह

नयाँ दिल्ली,अप्रिल २

भारतका प्रधानमन्त्री नरेन्द्र मोदीले कोरोना विरुद्धको लडाइ जित्न कोरोनाभाइरस संक्रमण परीक्षण, पहिचान, ‘आईसोलेसन’ र ‘क्वारेनटाइन’मा जोड दिन आग्रह गरेका छ्न् । भारतका मुख्यमन्त्रीहरूसँगको भिडियो बैठकका क्रममा बिहिवार उनले अझै केही हप्ता नागरिकको सुरक्षासँग विशेष सरोकार राख्ने यी काममा लाग्न आग्रह गरेका हुन् ।
केन्द्रीय सरकारले घोषणा गरेको ‘लकडाउन’लाई कार्यान्वयन गराउन प्रभावकारी भूमिका खेलेको भन्दै मुख्यमन्त्रीहरुलाई उनले धन्यवाद ज्ञापन समेत गरे । ‘लकडाउन’का कारण कोरोना भइरस विरुद्धको लडाइमा सफलता मिलेको पनि बैठकमा उनले बताए ।

प्रधानमन्त्री कार्यालयद्वारा जारी वक्तव्य अनुसार कोरोना विरुद्धको लडाईमा प्रदेशहरुले गरिरहेको कामको बारेमा उनले जानकारी लिएका थिए । उनीहरुले गरेको सामूहिक सहकार्यको बारेमा प्रधानमन्त्री मोदीले विषेश चासो राखेको वक्ततव्यमा जनाइएको छ । भिडियो बैठकमा अन्य देशहरुले गरिरहेको प्रयास र अभ्यासको बारेमा समीक्षा र चर्चा भएको थियो ।

बैठकमा प्रधानमन्त्री मोदीले जति सक्दो थोरै क्षति हुनेगरी कोरोना भाइरसको माहामारी नियन्त्रण गर्ने साझा उद्देश्य रहेको बताए । उनले भने,‘अझै केही हप्ता हामीले कोरोना भाइरसबाट संक्रमित भएको शङ्का लागेकालाई परीक्षण गर्ने, पहिचान गर्ने ,आईसोलेसन र क्वारेनटाइनमा राख्नेतर्र्फ विशेष जोड दिनुपर्ने भएको छ। ’
प्रधानमन्त्री मोदीले अत्यावश्यक स्वास्थ्य सामाग्रीको उत्पादन, वितरण र उपलव्धतामा ख्याल गर्न पनि आग्रह गरेका छन् । कोरोना भाइरसबाट संक्रमितलाई उपचारको पर्याप्त व्यवस्था भएको सूनिश्चित गर्न पनि उनले जोड दिए ।

बैठकमा सहभागी मुख्यमन्त्रीहरूले नेतृत्वदायी भूमिका, निरन्तर मार्गनिर्देशन र कठिन समयमा विशेष सहयोग गरेको भन्दै प्रधानमन्त्री मोदीलाई धन्यवाद दिएका थिए । प्रधानमन्त्री मोदीले मुख्यमन्त्रीहरूसँग यसअधि गत मार्च २० तारिखमा पनि भिडियो बैठक गरेका थिए ।

कोरोनाभाइरस : विश्वमा ४२ हजार ३४४ को मृत्यु र आठ लाख ६० हजार १६६ संक्रमित (अपडेट)

एजेन्सी, अप्रिल १

कोरोनाभाइरस (कोभिड–१९) संक्रमणको विश्वव्यापीे प्रकोपका कारण बुधबारसम्म विश्वभर मृत्यु हुनेको संख्या ४४ हजार १५० पुगेको छ । संंसारभर आठ लाख ८२ हजार ७८१ जना कोरोना भाइरसबाट संक्रमित बनेका विभिन्न मुलुकबाट एएनआईलाई प्राप्त तथ्याङ्कमा उल्लेख गरिएको छ ।

कोरोनाभाइरस संक्रमणबाट सर्वाधिक प्रभावित बनेको इटलीमा एक लाख ५ हजार ७९२ कुल संक्रमित भएका छन् भने १२ हजार ४२८ को मृत्यु भएको छ । यसैबीच १५ हजार ७२९ निको भएर फर्किएका छन् ।

स्पेनमा एक लाख दुई हजार १३६ कुल संक्रमित भएका छन् भने नौ हजार ५३ को मृत्यु भएको छ । यसैबीच १९ हजार २५९ निको भएर फर्किएका छन् ।

संयुक्तराज्य अमेरिकामा एक लाख ८८ हजार ८८१ कुल संक्रमित भएका छन् भने चार हजार ६६ को मृत्यु भएको छ भने सात हजार २५१ निको भएर फर्किएका छन् ।
चीनमा ८१ हजार ५५४ कुल संक्रमित भएका छन् भने तीन हजार ३१२ को मृत्यु भएको छ । यहाँ निको भएर घर फर्किनेको संख्या ७६ हजार २३८रहेका छन् ।

फ्रान्समा ५२ हजार १२८ कुल संक्रमित भएका छन् भने तीन हजार ५२३ को मृत्यु भएको छ । इरानमा ४७ हजार ५९३ कुल सङ्क्रमित भएका छन् भने तीन हजार व्यक्तिको मृत्यु भएको छ ।

बेलायतमा २९ हजार ४७४ कुल सङ्क्रमित भएका छन् भने, दुई हजार ३५२ को मृत्यु भएको छ । बेलायतमा निको भएर घर फर्किनेको सङ्ख्या १३५ मात्रै रहेको छ ।
जर्मनीमा ७३ हजार २१७ कुल सङ्क्रमित भएका छन् भने ८०२ को मृत्यु भएको छ । यसैबीच १६ हजार १०० निको भएको बताइएको छ ।

यस्तै दक्षिण एशियाली मुलुक पाकिस्तानमा दुई हजार ७१ जनामा संक्रमण रहेको छ भने भारतमा एक हजार ६३७ संक्रमित भएका छन् । भारतमा कोरोना संक्रमणबाट मृत्यु हुनेको संख्या ४५ रहेको छ भने पाकिस्तानमा २६ जनाको मृत्यु भएको छ । अन्य दक्षिण एशियाली मुलुकमा भने संक्रमण संख्या न्यून देखिएको छ ।––एजेन्सी

Nepal news headlines | breaking news kathmandu | national news of nepal live