EDUCATION

भारतमा स्थगित कक्षा १० र १२ को परीक्षा जुलाई १ देखि हुने

नयाँ दिल्ली,मे ८

भारतमा कोरोनाभाइरस संक्रमणका कारण अवरुद्ध भएको कक्षा १० र १२ को परीक्षा आगामी जुलाई १ देखि हुनेभएको छ । केन्द्रीय माध्यामिक शिक्षा बोर्ड अन्तर्गतको सो परीक्षा आगामी जुलाई १५ सम्ममा सम्पन्न गरिने तय भएको छ ।

केन्द्रीय सरकार अन्तर्गत रहेर लिइने केन्द्रीयस्तरको यो परीक्षा सार्वजनिक तथा निजी दुवैथरी विद्यालयका छात्रछात्राहरुकालागि महत्वपूर्ण मानिने गर्छ । “विद्यार्थीहरुको अत्यधिक चासो र चिन्ताको विषय बनेको यो परीक्षा सञ्चालन गर्ने निर्णय गरिएको छ,” केन्द्रीय जनशक्ति मन्त्री रमेश पोख्रियाले शुक्रबार भने ।

कोरोनाभाइरसको संक्रमण फैलिन थालेपछि सरकारले देशव्यापी लकडाउनको घोषणा गरेकाले यसअघि परीक्षा हुन सकेको थिएन । भारतमा अहिले पनि देशव्यापी लकडाउन कायमै छ ।––एएनआई । रासस

‘प्रवासी नेपालीहरु भारतकालागि साँस्कृतिक तथा जनसम्पर्क राजदूत हुन’: राजदूत आचार्य

मदन भण्डारी स्पोर्टस च्याम्पियनसिपका विजेता पुरस्कृत

एनआईबि संवाददाता,नयाँ दिल्ली

भारतकालागि नेपाली राजदूत नीलाम्बर आचार्यले नेपाल र भारतबीचको सम्बन्धमा न्यानोपना ल्याउन भारतमा रहेका प्रवासी नेपालीहरुको उल्लेखनीय योगदान रहेको बताएका छन् । भारतमा नेपाल र नेपालीको पहिचान स्थापित गराएका प्रवासी नेपालीहरुको प्रशंसा गर्दै उनीहरु भारतकालागि नेपालका वास्तवविक साँस्कृतिक तथा जनसम्पर्क राजदूतहरु रहेको बताएका छन् । मदन भण्डारी स्पोर्टस एकेडेमीले नयाँ दिल्लीमा आयोजना गरेको एक समारोहमा राजदूत आचार्यले प्रवासी नेपालीहरुलाइ सम्बोधन गर्दै भने, ‘भारतमा बसेर पनि नेपालीहरुले एकता कायम गरेका छन्, संघसंस्था बनाएर दुइ मुलुकलाइ जोडने कार्यक्रम आयोजना गरेका छन् । साथै नेपालप्रतिको मायालाइ जिउँदो राखेका छन् । उनीहरु वास्तवमा नेपालका साँस्कृतिक तथा जनसम्पर्क राजदूत हुन।’

प्रवासी नेपालीहरुको एक समुहद्धारा संचालित मदन भण्डारी स्पोर्टस एकेडेमीले आयोजना गरेको पहिलो मदन भण्डारी क्रिकेट च्याम्पियनशिप २०१९ पुरस्कार वितरण समारोहमा नेपालबाट सहभागि भएका पूर्व परराष्ट्रमन्त्री तथा मदन भण्डारी स्पोर्टस एकेडेमीका केन्द्रिय सदस्य महेन्द्र बहादुर पाण्डेले दिवगंत नेता मदन भण्डारीले खेललाइ राष्ट्रविकास सँग जोडेको स्मरण गरे । उनले भण्डारीको भनाई स्मरण गर्दै भने, मदन भण्डारी भन्नुहुन्थ्यो राष्ट्रको विकास गर्ने हो भने , ‘खेललाइ प्राथमिकता दिनै पर्छ । किनकी खेलले शरीर र मन दुवैलाइ स्वस्थ्य र सकारात्मक राख्छ । विकासकालागि यो दुवै अत्यावश्यक हुन्छ ।’

कार्यक्रममा नेपाली काँग्रेसका युवा नेता सन्दीप रानाले आफनो फरक राजनीतिक विचारधारा भएपनि भण्डारीको प्रशंसा गरेका थिए । उनले भने, ‘मदन भण्डारी आज सम्म भएको भए नेपाल अहिलेको अवस्था भन्दा निकै अगाडि पुगिसक्नेथ्यो । उनले नेपालको राजनीतिमा सबै पार्टीहरुले बीपी कोइरालालाइ संझिए सरह नै आफूले पनि भण्डारीलाइ स्मरण गर्ने गरेको बताए ।

समारोहमा एकडेमीले गत १९देखि २१ डिसेम्बरसम्म नयाँ दिल्लीमा आयोजना गरेको पहिलो तीन दिने टी–२० क्रिकेट च्याम्पियनशिप २०१९का विजेता समुहलाइ पुरस्कृत गरेको थियो । कुल आठ समुह सहभागी भएको टी २० खेलमा उत्कृष्ट प्रदर्शन देखाउँदै युनाइटेड मधेसी अफ नेपाल(युएमओएन)ग्लाइडेटर समुह विजेता बनेको थियो । त्यस्तै फाइनलमा ६९ रनले पछि परेको साउथ एशियन युनिभर्सिटी टीम फस्ट रनर अप भएको थियो । राजदूत आचार्य र पूर्व परराष्ट्र मन्त्री पाण्डेले संयुक्त रुपमा विजेता समुहलाइ च्याम्पियनसिप कप तथा प्रशंसा पत्रबाट पुरस्कृत गरेका थिए ।

खेल प्रति रुचि भएका प्रवासी नेपालीहरुलाइ वातावरण तथा अवसर प्रदान गर्ने उद्धेश्यले भारतमा आधिकारिक संस्थाको रुपमा मदन भण्डारी स्पोर्टस फाउन्डेसन स्थापना गरिएको हो । एकेडमीको अन्तराष्ट्रिय इन्चार्ज गोपाल थापाका अनुसार यो फाउन्डेसनले भारतमा मात्र नभएर मित्रराष्ट्रहरुसँग पनि इन्डो नेपाल मैत्रीपूर्ण खेलहरु गराउने वातावरण बनाउँदै लगेको बताए । यसअघि पनि फाउन्डेसनले ब्याडमिन्टन च्याम्पियनसीप लगायत आयोजना गर्दै आएको छ ।

सोही समारोहको दोश्रो सत्रमा स्थानिय कलाकारका साथै नेपालबाट आमन्त्रित गरिएको एबिसि इन्द्रेणी समुहले साँस्कृतिक कार्यक्रम प्रस्तुत गरेका थिए । भ्रमण वर्षलाइ समेत प्रचार गरिएको कार्यक्रममा नेपाली दूतावासका अधिकांश अधिकारीहरु,विभिन्न जनवर्गीय संगठन,सामाजिक संघसंस्थाहरु, रेमिटान्स कम्पनी तथा ट्राभल तथा टुर्सका कम्पनीका प्रतिनिधिहरुका साथै उल्लेख्य संख्यामा प्रवासी नेपालीहरुको सहभागिता रहेको थियो । कार्यक्रम नयाँ दिल्लीको चाणक्यपुरी, एन्ड्रियुज गन्ज स्थित सामुदायिक भवनको प्रांगणमा सम्पन्न भएको थियो।

कार्यक्रमका केहि तस्वीर:

अपोलो अस्पतालले गर्यो जटिल ट्यूमरको सफलता पूर्वक शल्यक्रिया

एनआईबि संवाददाता, नयाँ दिल्ली

नयाँ दिल्लीस्थित अपोलो अस्पतालले मस्तिष्क र मेरुदण्ढमा फैलिएको ट्यूमर (मेनिङजिआयोमा) को सफलता पूर्वक शल्यक्रिया गरेको छ। ४८ वर्षिय श्रेष्ठ थर भएका पुरुषको मेनिङजिआयोमा को शल्यक्रिया सफलता पूर्वक गरेको अस्पतालले जनाएको छ।

अपोलो अस्पतालका वशिष्ठ न्यूरोसर्जन प्रणव कुमारको नेतृत्वको टोलीले स्थायी ठेगाना नेपाल भएका श्रेष्ठको मस्तिष्क र मेरुदण्ढमा फैलिएको ट्यूमर सफलता पूर्वक निकालेको हो।

उपचारअघि श्रेष्ठको बानी व्यवहारमा परिर्वतन देखिनुका साथै शरिरको बाँया भाग कमजोर  पाइएको अस्पताले जारी गरेको प्रेस विज्ञप्तिमा जनाइएको छ। काठमाडौँमा पनि ट्यूमरको उपचार गराएका उनलाई अपोलो अस्पतालमा एमआरआई गर्दा बाँया भागमा  ठूलो ट्यूमरमा देखिएपछि उपचार गरिएको बताइएको छ।

‘शल्यक्रिया जोखिमपूर्ण मात्रै होइन, गाह्रो पनि थियो’, अस्पतालले जारी गरेको विज्ञप्तिमा भनिएको छ, ‘शल्यक्रियाको दौरान अधिक मात्रमा रक्तश्राव  हुने सम्भावना थियो र रक्तश्राव रोक्न नसक्दा बिरामीको ज्यानलाई खतरा थियो,’ विज्ञप्तिमा भनिएको छ।

काठमाडौँमा श्रेष्ठको ट्यूमरको उपचार भए पनि पूर्ण रुपमा ननिक्लिएपछि नयाँ दिल्लीस्थित अपोलो अस्पताल लगिएको थियो । ‘हामीले विरामीको ट्यूमर देख्ना साथ दोस्रो शल्यक्रिया गर्ने सल्लाह दिएका थियौँ, तर एक पटक शल्यक्रिया गरि सकेको परिवारले दोस्रो शल्यक्रिया गर्न अप्ठेरो मानेको थियो’, विज्ञप्तिमा भनिएको छ।
शल्यक्रिया सम्बन्धि जानकारी दिँदै शल्यक्रियामा संलग्न वरिष्ठ न्यूरोर्सजन प्रणव कुमार भन्छन्, ‘काठमाडौँमा गरिएको शल्यक्रियाभन्दा सफल रुपमा हामीले श्रेष्ठको ट्यूमर पूर्ण रुपमा निकाल्यौँ। शल्यक्रियापछि उनलाई काठमाडौँमा जस्तो रेडियोथेरापी गर्नुपरेन र रक्तश्राव पनि कम भयो।’
श्रेष्ठको ट्यूमरको शल्यक्रिया गर्दा उनलाई रगत दिनु नपरेको पनि अस्पतालले जारी गरेको विज्ञप्तिमा जनाइएको छ।

जेएनयू बन्यो प्रदर्शनकारीको अखडा

एनआईबि संवाददाता, नयाँ दिल्ली

आइतबार साँझ दिल्लीस्थित जवाहरलाल नेहरु विश्वविद्यालय (जेएनयू)मा भएको विद्यार्थी र प्राध्यापकमाथिको सांघातिक आक्रमणको चौतर्फी विरोध भएको छ। आक्रमणमा सत्तारुढ दल संलग्न रहेको भन्दै भारतका अधिकांश राजनीतिक पार्टीले भारतीय जनता पार्टीको विरोध गरेका छन्।

भारतीय राष्ट्रिय कांग्रेसका पूर्व अध्यक्ष राहुल गान्धी देखि सत्तारुढ दलकै वित्तियमन्त्री र विदेशमन्त्री समेतले जेएनयूमा भएको आक्रमणको विरोध गरेको विषयलाई आज भारतबाट प्रकाशित सबै राष्ट्रिय दैनिकले प्राथमिकताका साथ समाचार प्रकाशित गरेका छन्।

द हिन्दुमा प्रकाशित समाचार  अनुसार भाजपालाई सरकारले जेएनयूमा आफू विरुद्ध उठेको विरोधकोे आवाजलाई दमन गर्दै विश्वविद्यालयलाई राजनीतिककरण गरेको आरोप विपक्षी दललाई लगाइएको जनाएको छ। विश्वविद्यालयले बढाएको शौक्षिक शुल्कको विषयमा जेएनयूमा केही समय यता विद्यार्थी आन्दोलित थिए।

भाजपाको आधिकारीक ट्वीटरमा जेएनयूमा आइतबार भएको घटनालाई भत्सना गरिएको छ। ‘हामी जेएनयूमा भएको आक्राणमा घोर भत्सना गछौँ। यो राजनीतिक अराजकता फौलाउने प्रयास हो। विश्वविद्यालय शिक्षा आर्जन गर्ने थलो हुनुपर्छ।’

यता जेएनयू विद्यार्थी संगठनका पूर्व अध्यक्ष समेत रहेका भारतीय कम्युनिष्ट पार्टी (सिपिआई) का महासचिव सिताराम यचुरीले जेएनयूमा भएको हमलालाई राष्ट्रिय स्वंयमसेवक दलको हिन्दुत्वको आवाजलाई बुलन्द पार्ने योजना अन्तर्गत  भएको आरोप लगाएका छन्।

आइतबार भएको आक्रमणमा जेएनयू विद्यार्थी संगठनका अध्यक्ष घाइते भएको बताइएको छ। अपरिचित नकाबधारी समुह विश्वविद्यालय हाताभित्र प्रवेश गरि विद्यार्थी र प्राध्यापकमाथि हातापाई गरेको आरोप छ।

भारतपछि पर्नुमा शिक्षामा कम लगानी

एनआईबि संवाददाता, नयाँ दिल्ली

गोवाका गर्भनर सत्यपाल मल्लिकले बुधाबार भारतका जम्मा पाँच जनाले मात्रै नोबर पुरस्कार पाएको बताएका छन्। भारतीयले कम नोबल पुरस्कार पाउनुमा शिक्षा क्षेत्रमा भएको कम लगानीलाई उनले कारण देखाएका छन्।

बुधबार आयोजित राष्ट्रिय समुन्द्र विज्ञान संस्थाले आयोजना गरेको कार्यत्रममा बोल्दै गर्भनर मल्लिकले भारतका बाह« जनाले नोबल पुरस्कार पाएको तथ्य गलत भएको बताए। बाह« जनामध्ये ६ जना विदेशी र एक जना मदर टेरेसा भएको भन्दै नोबल पुरस्कार पाउन खास पाँच भारतीय रहेको उनले भनाई थियो।

आजको द हिन्दुमा प्रकाशित समाचारमा जनाइए अनुसार अमेरिका र बेलायतका एउटै विश्वविद्यालयका एक सय ५० प्रध्यापकसम्मले नोबल पुरस्कार भएको बताउँदै मल्लिकले भारतमा शिक्षामा प्रयाप्त लगानी नहुँदा भारत पछि परेको बताएका छन्।

यस्तै उनले राष्ट्रिय अर्थतन्त्रलाई बढाउन सरकारले कृषि क्षेत्रमा पनि प्रयाप्त मात्रामा लगानी गर्नुपर्ने बताएका छन्।

बनारस विश्वविद्यालयले नेपाल भारतसम्बन्धमा ठूलो भूमिका खेलेको छः राजदूत पुरी

एनआईबि संवाददाता, काठमाडौँ

नेपालका लागि भारतका राजदूत मञ्जिवसिंह पुरीले नेपाल भारत साँस्कृति सम्बन्धको विषयमा जानकारी लिन बनारस जानुपर्ने बताएका छन्। बनारस विश्वविद्यालयका संस्थापक महामाना मदन मोहन मालवियको १५८ औँ जन्म जयन्तिको अवसरमा काठमाडौँमा आयोजित एक कार्यक्रमलाई सम्बोधन गर्दै राजदूत पुरीले उक्त कुरा बताएका हुन्।

कार्यक्रममा बोल्दै राजूत पुरीले नेपालको पठन संस्कृतिसँग बनारस प्रचिन समयदेखि जोडिएको बताए। नेपालका पत्रपत्रिका प्रकाशनदेखि राजनीतिक आन्दोलनसम्म बनारस जोडिएको उनले बताए।

बनारस विश्वविद्यालयमा अध्ययन गरि नेपाल फर्किएका व्यक्तिले विविध समयमा नेपालको राजनीति, प्रशासनिक र शैक्षिक क्षेत्रमा ठूलो योगदान दिएकोमा उनले धन्यवाद ज्ञापन गरे।

सो अवसरमा बनारस विश्वविद्यालयमा अध्ययन गरि नेपालको विभिन्न क्ष्ँोत्रमा योगदान दिने तीन व्यक्तिलाई सम्मान गरिएको थियो।

हेटौडामा नेपाल–भारत मैत्री पोलिटेक्निक परियोजना शुभारम्भ

एनआईबि संवाददाता,काठमाडौं

मकवानपुरको हेटौडामा नेपाल–भारत मैत्री पोलिटेक्निक परियोजनाको शुभारम्भ गरिएको छ । प्रदेश ३ का मुख्यमन्त्री डोरमणि पौडेल र भारतीय कार्यवाहक राजदूत डा अजय कुमारले मंगलबार हेटौडामा परियोजनाको संयुक्त रुपमा  भुमिपुजन गरेर शिलान्यास गरे ।

कार्यक्रममा बोल्दै मुख्यमन्त्री पौडेलले परियोजनाहरु शिलान्यास हुने तर काम नभएर थन्किने परिपाटी बन्द हुनुपर्ने बताएका छन् । बहुप्रतीक्षित नेपाल–भारत बहुप्राविधिक महाविद्यालयको शिलान्यास कार्यक्रममा पौडेलले तोकिएको समय सीमाभित्र काम सम्पन्न गरे ठेकेदार कम्पनीलाई सरकारले पुरस्कृत गर्ने बताए ।

उनले २२ वर्ष अघिदेखिको सपना पूरा हुने दिशातर्फ अगाडि बढेको जनाउँदै सरकारले आगामी तीन वर्षभित्र कक्षा सञ्चालन गर्ने वातावरण बनाउने दाबी समेत गरे ।

कार्यक्रममा नेपालस्थित भारतीय दूतावासका कार्यवाहक राजदूत डा.अजय कुमारले तोकिएको समयभित्र निर्माण सम्पन्न गर्ने प्रतिवद्धता व्यक्त गरे । सुस्ताइसकेको परियोजनालाइ मुख्यमन्त्री पौडेलले ब्युँताएर शिलान्यासको अवस्थामा ल्याएको भन्दै उनले आगामी दुइवर्षभित्र यो परियोजनाको निर्माण सम्पन्न गर्ने प्रतिबद्धता व्यक्त गरे ।

व्यवसायिक तालिमको क्षेत्रमा अत्याधुनिक पूर्वाधार परियोजनाको रुपमा रहेको नेपाल भारत मैत्री पोलिटेक्निक परियोजना भारत–नेपाल विकास साझेदारी कार्यक्रम अन्तर्गत भारत सरकारको ३८ करोड ५३ लाख भारतीय रुपैया(६२ करोड नेपाली रुपैया) बराबरको अनुदान सहयोगमा निर्माण हुँदैछ । परियोजनाकालागि निर्माण कन्सल्टेन्ट प्रालि परियोजना व्यवस्थापन परामर्शदाता तथा टेलिकम्युनिकेसन्स कन्सल्टेनट इन्डिया परियोजना ठेकेदार नियुक्त गरिएका छन् ।

यस पोलिटेक्निकमा २६ वटा सुविधासम्पन्न भवन अन्तर्गत प्रशासनिक भवन, प्राज्ञिक भवन, सभाहल, पुस्तकालय, कार्यशाला एवम् बहुउद्देशीय हल, छात्र–छात्राका लागि छुट्टै होस्टल, प्रधानाध्यापक तथा कर्मचारीका लागि आवासीय भवनका साथै खेलकुल तथा समुदायका लागि विभिन्न सुविधाको व्यवस्था सहित निर्माण हुनेछ ।

हेटौँडा–६ स्थित चित्रेपानी सामुदायिक वन क्षेत्रमा रहेको करीब २७ बिघा क्षेत्रफलमा भवन निर्माण हुन लागेको हो ।

भारतीय राजदूतद्धारा खलंगाको नवनिर्मित स्कुल भवन उदघाटन

एनआईबि संवाददाता,काठमाडौं

भारतको सहयोगमा निर्माण सम्पन्न सुदुरपश्चिम प्रदेशको दार्चुला जिल्लाको खलङ्गा गाविस स्थित महेन्द्र मोडल उच्च माध्यमिक विद्यालयकोे नयाँ भवन उद्घाटन गरिएको छ । शुक्रबार नेपालकालागि भारतीय राजदूत मंजीवसिंह पुरी तथा उपप्रधान तथा  स्वास्थ्य तथा जनसंख्या मंत्री उपेन्द्र यादवले संयुक्त रुपमा  नवनिर्मित भवनको उदघाटन गरे ।

भारत सरकारको ३ करोड नेपाली रुपैया बराबरको आर्थिक सहयोगमा निर्माण भएको यो नयाँ भवनमा १३ कक्षा कोठा सहित एउटा बैठक कोठा, प्रत्येक तलामा छात्रछात्राकालागि शौचालय र फर्निचर राखिएको छ ।

१९६०मा खलङ्गा गाविसमा स्थापना भएको यो विद्यालयमा हाल २ हजार बढि विद्यार्थीहरु अध्ययनरत छन् । जसमध्ये ५० प्रतिशत बढि छात्राहरु रहेका छन् । राष्ट्रिय परीक्षा बोर्डबाट सम्बन्धन प्राप्त विद्यालयले प्राथमिक तहदेखि विज्ञान, मानविकी तथा व्यवस्थापन संकायका उच्च माध्यमिक तह सम्म अध्यापन गराउँदै आएको छ । विद्यालय व्यवस्थापन समितिको निर्णय अनुसार योग्य तथा सीमान्तकृत वर्गका विद्यार्थीहरुलाई विद्यालयले विविध छात्रवृत्ति समेत प्रदान गर्दै आएको छ । विद्यालयले खेलकुद, पुस्तकालय, कम्प्युटर प्रयोगशाला, विज्ञान प्रयोगशाला, शैक्षिक परामर्श, मल्टिमेडिया, छात्रवृत्ति, शैक्षिक भ्रमण, कक्षा कोठा लगायत अन्य विभिन्न सुविधाहरु प्रदान गर्दछ ।

शिक्षाको क्षेत्रमा पूर्वाधार विस्तार गर्ने नेपाल सरकारलको प्रयासमा भारत सरकारले गर्दै आएको आर्थिक सहयोगको यो निरन्तरता हो । यस अघि पनि पूर्वमा मेचीदेखि काठमाडौंमा समेत विभिन्न शैक्षिक पूर्वाधार विकासमा भारत सरकारले सहयोग गरेर नयाँ संरचनाहरु सम्बन्धित समुहलाइ हस्तान्तरण गरिसकेको छ ।

English summary:

India Builds higher secondary school in Darchula District

Ambassador of India to Nepal Manjeev Singh Puri inaugurated Shree Mahendra Model Higher Secondary School, Khalanga in Darchula District,along with  DPM & Minister for Helath and Population,Upendra Yadav. The new infrastructure constructed with the Government of India’s grant assistance of NRs. 30 million, is a two storied building comprising 13 class rooms, one meeting hall, separate sanitation facilities for boys and girls on each floor and furniture.

This School, established in 1960, is situated at Khalanga VDC in Darchula District, Sudurpashchim Pradesh (Province No. 7). The newly built infrastructure is expected to boost learning environment of students. Government of India is happy to be associated with the project which compliments effort of Government of Nepal in augmenting infrastructure in the field of education.

It is affiliated to NEB (National Examinations Board) and offers Ten Plus Two (10+2) programs in Science, Humanities, and Management streams. Mahendra Model Secondary School, Khalanga, Darchula provides primary to 10+2 level programs with moderate fees structure.

It also provides various scholarship schemes for deserving and the marginalized students as per the decision of school management committee. Mahendra Model Secondary School (MMSS) provides various facilities such as Sports, Library, Computer Lab, Science Labs, Counseling, Conference, Multimedia, Scholarship, Educational Tours, Classrooms etc.The School has over 2000 students, about 50% of whom are girls.

भारतीय दूतावासको सहयोगमा निर्मित कुलेश्वर विद्यालय उदघाटन

एनआईबि संवाददाता,काठमाडौं

भारतीय दूतावासको सहयोगमा कुलेश्वर आवास माध्यमिक विद्यालयको निर्माण सम्पन्न भएको छ । काठमाडौंको कुलेश्वर वडा नं १४ स्थित विद्यालयको नवनिर्मित भवनको शनिबार उदघााटन गरिएको हो । भारतीय दूतावास,काठमाडौंका नियोग उपप्रमुख डा अजय कुमारले नवनिर्मित विद्यालयको उदघाटन गरेका छन् ।

भारत सरकारको यो भवनकाागि ३ करोड ८६ लाख रुपैयाँ अनुदान सहयोग गरेको छ । नवनिर्मित तीन तल्ले भवनमा २० कक्षाकोठाका साथै प्रत्येक तल्लामा छात्रछात्राका लागि छुट्टै शौचालय, अण्डरग्राउण्ड पानीट्याङ्की, सेप्टिक ट्याङ्की तथा फर्निचरको व्यवस्था रहेको छ । विद्यालय निर्माणको परियोजनालाई काठमाडौं जिल्ला समन्वय समितिले कार्यान्वयन गरेको हो।

सन् १९८९ मा कुलेश्वर आवास परिवार कल्याण संस्थानले स्थापना गरेको सो विद्यालय समुदायको सहयोगबाट सञ्चालित हुँदै आएको छ । विद्यालयमा ८सय बढी विद्यार्थीहरु अध्ययनरत छन् । आधाभन्दा बढी छात्रा रहेको विद्यालय प्रशासनले जनाएको छ । विद्यालयमा अध्ययनरत अधिकांश विद्यार्थीहरु समाजका सिमान्तकृत वर्गका छन् ।

नेपालको शिक्षा क्षेत्रको पूर्वाधार विकासमा भारत सरकारले सहयोगी भुमिका निर्वाह गर्न यस किसिमको सहयोग गर्दै आएको छ । यस अघि झापाको स्कुल चौन तथा कोटेश्वर बहुमुखी क्याम्पसको भवन बनाएर सम्बन्धित व्यवस्थापनलाइ हस्तान्तरण गरेको थियो ।

नयाँ दिल्लीको जन्तर मन्तरमा संविधानको विरोध

एनआईबि संवाददाता,नयाँ दिल्ली

नयाँ दिल्लीमा शुक्रबार नेपाली दूतावासले संविधान दिवस र राष्ट्रिय दिवस मनाइरहदा जन्तरमन्तरमा राष्ट्रिय विद्यार्थी संघ भारतका विद्यार्थीहरुले विरोध जनाउँदै संविधानलाइ कालो दिनको संज्ञा दिए । संघमा आवद्ध विद्यार्थी सदस्यहरुले कालो ब्यानरमा संविधान विरोधी नारा लेखेर विरोध प्रदर्शन गरेका थिए । संविधान विभेदकारी भएको नारा लेखिएका प्लेकार्ड समेत प्रदर्शन गरिएको थियो । विरोध कार्यक्रमकालागि दिल्लीमा अध्ययनरत राष्ट्रिय विद्यार्थी संघ भारतका विद्यार्थीहरु सहित राष्ट्रिय जनता पार्टीका नेताहरुको समेत सक्रिय सहभागिता थियो । कार्यक्रममा नेपालबाट राजपाका केन्द्रिय सदस्य र जिल्ला सदस्यहरु समेत सहभागी भएका थिए ।

Nepal news headlines | breaking news kathmandu | national news of nepal live